الجزء 1

-تاكسي! تاكسي! 
أوف هادي ساعة ونا كنتسنا و لا واحد بغا يوقف. وقيلا شبعو أ ولاو كيدفعو كبير! امتى ياربي تعفو علي و ندير حتى انا شي حديدة ونتهنا من هاد العذاب اللي سميتو الترانسبور؟
سمحو لي نقدم لكم نفسي! انا سميتني بشرى، وصحابتي وخوتي كيدلعوني و يقولوا لي بيبيش. هاها بيبيش زعما تجي معايا؟ المهم انا بنت المعلم بوشعيب مول الفران والوالدة عفوا ماما سميتها رقوش! بابا عروبي و ماما من زيان. انا البنت الثالثة و عندي جوج خوت دراري. بابا بحالو ماكاينش فالظرافة واللطافة. حتى ماما ظريفة غير نكارة بلا سبب. فالاول كانت كاتعصبني ولكن ديت على النكير وما بقيتش كيف الاول. والديا ماكتابش ليهم اقراو، ولكن داروا لي فجهدهم باش كلنا نقراو و نكملو. خوتي كاملين توظفو وداروا ولادهم، كاين بهيجة و سي محمد و أناس. بقيت غير انا وختي الصغيرة سارة. ماما تظل تدعي معا باش الله اسكم سعدي. فالاول كنت كانقول امين من بعد وليت كنمل من هاد الدعوة. على ما كيقولو انا خرجت ليهم من الجنب ولكن أقسم بالله الى غير مظلومة. مرة مرة كنتعصب وندير اللي بغات كانتي و خا هاكاك كنسمع للنصائح و ما نقدرش نخسر الخاطر لشي حد. ماما ديما كتنتاقد طريقتي فاللباس وكتقول بلي العصري ماشي ليا. كنشوف تانعيا ونقوليها كان عليكم منهار الاول تلبسوني البلدي ماشي حتى كبرت أ ولفت.
قريت وخذيت ديبلوم فالمحاسبة ومن بعد ثلث سنين ديال الشوماج دبرت على واحد الخدمة فواحد الشركة. الشهرية ماشي تا لهيه ولكن قاضية بها الغرض. كلشي حاسبني انا هي المديرة هههه. واخا خوتي خدامين ما كاين غير سلفني اختي حتى نرد ليك وشي ردان ما كاين. عيالات خوتي حتى هما طامعين فيا ونا لاعبة العشرة، عاجبني راسي. ما كاين غير واخا. ملي عقت لقيت مشا الحال. كون جمعت دوك الفلوس كون درت لاباس. منهار قطعت عليهم الماء والضو ولات سميتي بشرى حرفية . مشات ديك ختي بيبيش! حلفت ماباقي شي حد ايشوف من عندي ريال من غير بابا و ماما و مرة مرة ندور مع أختي الصغيرة. دابا قربات التمانية و مازال ماجابش الله الترنسبور. ديما كاتوقع ملي كنبات متبعة المسلسلات وما كانعس بكري. البارح دارها بيا الواتساب. بقينا تيتي تيتي فواحد الكروب حتى الخمسة ديال الصباح!!! كون عاقوا بيا فالشركة كون قالوا ليا بقاي فداركوم ما باقيش تجي.! الله ها واحد الطاكسي خاوي. اخيرا! شيرت ليه وقف وهزني. الباب دالشركة مسدود كيف العادة. با اسماعيل العساس الله يهديه يدو عالقرص. بطا عليه غير وقتاش اهبط الريدو. صونيت وطل علي من الشرجم الصغيور. تقول شي مرا حاجبة.
-اه، نتي هادي! اوا سربي قبل ما يشوفك المدير راه اليوم كاعي! وعنداك الى تلاقا بيك تقولي انا لي حليت ليك الباب!
-لا كن هاني ابا لسماعيل. خيرك مانساه.
شاف فيا وقال:
- كلكم كاتقولوها و ملي نتخصو و نبغيو شي سلف، ما كاينش لي اعتق! غير سيري أبنيتي الرجاء فالله.
خليتو و بديت كانزرب باش ما نتلاقا بالمدير. فايت عاطيني انذار و ما في ما يتسخسخ.
- اجي انت اديك المتعوسة! اش هاد الوقت؟
ناري حصلت! صافي هو! الصوت ديالو هادا. ماكاينش الشك. درت، فعلا لقيتو هو. شنو المعمول ياربي مولاي؟
- تبعيني للبيرو دابا!
-واخا نعامس! اللي تشوفو!
تبعتو للمكتب ونا كنترعد. انا اللي درتها لراسي، بزز لقيت هاد البوسط و جالسة تيتي تيتي. الله ادوز هاد الساعة على خير وصافي. المدير هو فالحقيقة ظريف ولكن صارم. نقوليكم ايكون ولد شي ربعين. باقي جون و مابايناش عليه مدير. هههه علاه كيف كايكون المدير؟ المهم كلشي كايقول ما بايناش عليه. لقيتو جالس فوق الكرسي وكايتسنا.
-فراسك؟ راك زدتي فيه! هادي المرة الثالثة. فين وصلتي فدوك الضواسا؟
- نعامس راه خداتهم من عندي ليلى وقالت غاتكملهوم!
-واش كاضحكي عليا؟ انا ما كانعرف لا ليلى ولا رقية! الخدمة، انتي لي كلفتك بيها. الى ليلى بغات دير السطاج ماشي فضواسا مهمين بحال هادوك. دابا واش ماحاساش بالمسؤولية؟ راه ماشي صعيب نقوليك باي باي ولكن نظرا للكفاءة ديالك، باغيك تمشي بعيد. هادي اخر مرة وكنقسم ليك مرة خرى ما تلومي غير راسك. يالله الضواسا اوجدوا اليوم وخا تباتي هنا. غبري عليا هاد الساعة!
ما صدقتش ودني. اول مرة المدير كايعتارف بالكفاءة ديالي و نا كنت حاسبة راسي هي المكلخة فالادارة. اه تمنيت كون دوك المحسادات ديال مريم و سهام كانوا حاضرين و يسمعوا على ودنيهم. ملي خرجات هكدا على خير ما باقيش نعاود و من اليوم غانبين حنة يدي و نوريهم علاش قادة!
يتبع....