الجزء 3

دغيا دازت ساعتين. كملت الخدمة اللي طلب مني و قال لي نتسناه عند باب الشركة حتى يجري شي مكالمات. ملي وقفت حدا البيت ديال باسماعيل أول مرة كايجيب لي كرسي و كايعيط لي للا بشرى! لا! نزيدكم، جاب لي واحد الكاس ديال اتاي تقول موجدو على حسابي. تخميني كان فمحلو. خبرني بلي اتاي من النوع الممتاز و كيوجدو غير للناس الالبة. أها!!! هي وليت وحدة منهم. سبحان الله شحال امكن يوقع فساعتين! باسماعيل هو لابواط نوار ديال الشركة. منو عساس و منو شاوش و عارف الشادة و الفادة. اولادو فلبلاد و عايش بوحدو. كيمشي ملعيد لعيد. اليوم غايعطيني واحد المعلومة و ما عرفتش شنو هي المناسبة ولكن عندو الطريقة باش يوصل بلى مايبان فضولي ولا بركاك. قالي:
- اوا اللا بشرى ياكما تكرفستي اليوم؟
- لا هانية غير شي ملفات وصافي!
و باش يمشي بعيد زاد:
- اه اوا نيت هاد الموظفات الله اهديهم ما كايديروش خدمتهم و المدير مسكين داير معاهم بخير. و المشكل ما يدو لولدو ما يدو للشركة!
- علاه مال ولدو؟
- اوا ابنتي للا بشرى الأم الى كانت غايبة، كيولي الأب منو الأم و منو الأب!
- ما فهمتش اباسماعيل، علاش فين مشات مراتو؟
- واه ما فخباركش؟
- كون فخباري اباسماعيل كاع ما نجي اليوم. ياك ديما انا اخر من يعلم!
- اوا ابنتي مراتو الله اواليها برحمتو!
حسيت برجلي شاداهم القفقافة ماعرفتش اش نقول. وليت تالفة و بديت كنعزي فباسماعيل بحال الى هو اللي ماتت ليه المدام. خبرني بلي كانت كاتعاني من شي مرض خايب و ما قدروش الأطباء يديرو ليها شي حاجة. دابا شي ربع سنين و المدير بلى زواج! زعما يكون من نصيبي؟ هههه فين هو وفيني انا؟
دازت نص ساعة ونا كنتسنا ها هو عاد خارج. واخا شوي قاسح لقيتو انساني و متواضع و كيعاملك بحال الى نتا من عائلتو. ما فيهش التصنع و كايهضر بلغة الشعب (هادي نقلتها من عند خويا سي محمد، ديما كيقولها الى بغا اشكر شي شخصية معروفة!). دور الموطور و خدم موسيقى هادئة و شد الطريق. الحي فين ساكنة بعيد بشي 25 دقيقة و مع الزحام امكن توصل ل 45 دقيقة. ونا فالطوموبيل ما كرهتش كاع اللي كيعرفوني اشوفوني. حيث المدير معروف و السمعة ديالو سابقاه. بزاف ديال العائلات عايشين معاه و هو مامقصرش. كايساعد فالمناسبات ا وقت ما وقف عليه شي حد ما كايردوش. ملي كنا فالطوموبيل، سولني سؤال ما فهمتش اش كايقصد بيه ولكن خلاني عايشة فالحلم. قلت مع راسي ياكما بغى يعرف واش عندي مع الطبخ! قال لي:
- واش المرقا باش كاتعشاي نتي اللي كاتصاوبيها و لا الوالدة؟ جاني السؤال مفاجئ، ونا نجاوب بكل براءة:
- لا راه ما كنديرو المرقا غير الى جاو عدنا الضياف اما غالبا الشعرية و لا الروز!
تبسم و قاليا:
- هممم الروز! واخا! بحال المرقا بحال الروز! الله اجيب غير الصحة والسلامة!
و هو يضربها بسقلة حتى وصلنا لراس الدرب. انا بليدة، وقيلا السيد بغا يجمع ساعة ما لقاش معامن! ههه الشعرية و الروز! كون غير عطيتو الوصفة باش نيت تكمل!
طوموبيل بحال ديال المدير فحومتنا ما غاديش تمر مرور الكرام. تقول الهدية اللي جاية. البراهش بحال الى شمو ريحت ليصانص منعرف منين خرجوا! بقاو تابعينها حتى وقفت! الشراجم تحلو، حتى مول الحانوت و الجزار و القباص خلاو محلاتهم وخرجوا إشوفوا. عجبني حالي و ما بغيتش نزل من الطوموبيل كون ما سولنيش واش وصلنا. مسكين بغا إدير فيها الكالونتري (اللباقة) و ينزل احليا الباب، كانت غاتجيه واحد القرعة طايشة فالراس كون ما فانتاها. هادشي عادي عدنا فالدرب. مرة مرة كتوقع شي مخاصمة بين ولاد الدرب و ماكاينليك غير شير باش ماجاب الله. البوليس معندو مايدير هنا. المشاكل كتحل بين الجيران. ما عرفتش باش نواسيه و بحال الى حس قالي: هههه ماشي مشكل! هادا علاش سموها الأحياء الشعبية! ركب فطموبيلتو و زاد مع الطريق. بقات بيني و بين الدار شي 300 مترو واش جا ما يدوزها. الصباح لله! ها القاتلة مها جايا! سموها القاتلة امها حيث امها ماتت بفقايسها. هي نجاة بنت علي الجزار. ما كاتحملني ماكانحملها. كانت معدية علي ملي كنت صغيرة. اللي شافتها عندي تقلعها ليا و الى ما بغيتش ضربها ليا بشي نتفة فاعلة تاركة. كايعياو ما يعصيوا فيها ما كاتكر فيها عصا. دارت فيا شي تخنزيرات تقول واخدا ليها الراجل! ملي قربات مني ما تهنات حتى لاحت دوك جوج كلمات اللي قاجينها: الدجاج البلدي ما بقا حد يحاشيها ليه! قالتها و كاتسنا نجاوبها ولكن حمدت الله وشكرتو جلال ولد امي عيشة سمعها، وحيث كندور معاه هناني من الجواب. باش تسمعو مزيان غوت بالصوت اللي عطاه الله و بلى ما يشوف جيهتها قال: الدجاج البلدي داير الثمن و حسن من لحم الجاموس! الهضرة انتشرت بسرعة الريح و اراك للضحك! القاتلة مها عارفة جلال ما معاهش اللعب و مايسوا ما يصلح، واخا تقدر تنيه على ربعة مع الغلض اللي عندها، حدرات راسها و تلاحت! هاد التدخل السريع ديال جلال العظمة كلفني 20 درهم. كوني هانية اختي بشرى! واخا خوتك خواو الدرب راه ما زال عندك فيه الخوت. يالاه، دوري معا خوك!
بتبع....