الجزء السابع والأخير

ماما ما كيفوتها والو. دغيا ردات البال و حسات بلي شي حاجة ماشي هيا هاديك! بخلاف الايام الاخرى سولتني بكل حنان: مالك ايلي ( بنتي) شفتك مغيرة. اش واقع؟ ياك لا باس؟ بلى ما نطول عليها خبرتها بلي المدير ديال الشركة طالبني للزواج. مصدقاتش وظنت بلي هادا مقلب من المقالب دياولي. ملي شرحت ليها كلشي قالت: اوا الله ايجيب اللي فيها الخير.
الغد ليه مشيت لخدمتي عادية و من بعد ساعة اتصل بيا المدير. هاد المرة بالتلفون. قال لي: اشنو قررتي؟ جاوبتو: موافقة! قال لي خلي هاد الموضوع بيني وبينك حتى نسالي شي امور ونجي نشوف داركوم. قلت: اللي تشوفو السي كمال. ضحك وقال: سميتي كمال بلى السي. قلت واخا نعامس!
من بعد عشر ايام عيط ليا وقال لي: من غدا راكي فعطلة. سيري علمي مالين الدار بلي السبت الجاي غانجي نطلبك رسمي! حل الكوفر وجبد بريكة و قال: شي بركة باش تقضي اللي خاصك! شديت الفلوس ودرتهم فصاكي و خرجت بلى ما ندور وجهي. لقيت با اسماعيل كيسقي الشجيرات اللي فالدخلة. اول ماشافني جاء كايجري لعندي وقال لي: راه المدير وصى الشيفور باش اوصلك، دابا يكون هنا. من خلال الشوفات والحركات ديالو باين بلي شام شي حاجة. با اسماعيل بالخبرة اللي عندو فتقصي الحقائق: البق ما يزهق. واخا المدير قال بلي الموضوع بيني و بينو مانظنش بلي هاد التحول ما غاديش يرد ليه البال! هادشي علاش خاطرو ما هناه و سولني بطريقتو الخاصة: ياك هانية اللا بشرى؟ والله حتى هاد المساخيط عينيهم خايبة. منهار دخلتي عند المدير ما كاين غير التأويلات! اوا الله اجازي كل واحد على نيتو. شي وحدين كايقولوا بلي "شاف بيرسونيل" ما دايرش خدمتو و يمكن تشدي داك البوست. اوحدين خرين قالوا بلي المدير كايوجدك لشي فرع جديد ديال الشركة! خليت با اسماعيل كيثرثر كما بغا و ما دا مني غرام ديال الحقيقة! عارفاه خاص غير ما يوصل. جاء الشيفور و شدينا الطريق للدار. بعدا هذا مقابل خدمتو و ساكت. وتقول نطق بشي كلمة!
ماما من بعد ما شافت الفلوس تأكدت بلي الموضوع جدي و معقول. بطا عليها غير امتى يدخل سيدي بوشعيب. ما عمرها داتها فوقتاش دخل ولا وقتاش خرج. اليوم غير تدور و تسول. طلبات مني البورطابل حيت هي ما بغاتش تدير ديالها. كتقول بلي البورطابل كيقضي على الشوق! خاصها توحش الناس اللي عزاز عليها عاد تتصل بيهم. الهضرة كل ساعة، كتولي العلاقات باردة والكلام ما فيه حلاوة. هادي هيا ماما رقوش. كنتساءل ديما منين تعلمات هاد الحكمة. تصلات بخوتي وعلماتهم. اصلا لي كيهمها هي ختي بهيجة. ما كاينش شي حاجة تدار بلى ما ياخدو رايها. كنت ديما كنغير منها واخا هي كبر مني. اللي منحملش هو تبقى ماما تقارني بها! علاش ما شبهتي ختك؟ شوفي فين وصلات!.... ولكن ملي كبرت ولات عزيزة عليا و كانخد حتى انا ريها فشي حوايج. حيدت لماما البورطابل مازال ما كملات هضرتها و دويت مع بهيجة باش توريني اش خاصني نشري. قالت لي ماندير والو حتى تجي. قلت ليها انا بغيت غير شي حاجة عادية و نفضل إدوز العرس حسي مسي! بغات تنتف راسها: اويلي واش حماقيتي؟ جاب ليك الله عريس تحفة وتقولي حسي مسي؟ هادي هيا المناسبة فاش تفرحي و باغيا طيرها! راه خداوهوم بلاخدمة بلا ردمة و دارو عراسات قداش. مالك انت اش ناقصك؟ يالاه باركا من الهبال و جمعي راسك هانا جايا! بقيت ساكتة ما عرفت اش نقول.
دازت الخطبة وحضرات مامات كمال أ ولدو و اختو. ولقيت فيهم نفس التواضع، رغم الفارق الاجتماعي. .ياسين ولد كمال دغيا دخل لقلبي وحتى هو ولفني. اتفقنا باش نديرو العرس من بعد اسبوع. و تفاجئت ملي قال لي كمال بلي كايفضل اديرو عندنا فالحي ديالنا! قاليك اتوحش الاجواء الشعبية! ماماه وختو ما كان عندهم حتى اعتراض. بالنسبة للمدعوين، خلا ليا الحرية نعرض على لي بغيت. ضحك ملي قلتيه بلي فدربنا ماكانحتاجوش نعرضو. كلشي معروض! اوا وصاني ما نساش الموظفين دالشركة. فالحقيقة نسيتهم. المهم نعرض عليهم و اللي بغا يجي مرحبا به واللي جاه الحسد شغلو هاداك.
الدرب ملي ساق لخبار كلشي تطوع باش اساعد. القرار تعطا باش الزنقة اللي ساكنين فيها تتسد على الطموبيلات و الماطر. الدراري غايتكلفو بالأمن. العيالات تجمعوا و كل وحدة خدات مهمة. الفران ديال بابا خدام ليل و نهار. الجزار تبرع بعجل و مول الدجاج زاد عشرين دجاجة فابور. اييه اش كايتسناك ابابا بوشعيب! هادشي كلشي خاصك تردو ملي ازوجو ولادهم. ولكن ماشي مشكل هادي هي عوايدنا فالدرب. تقول شي حفلة رسمية. الزنقة تغسلات و الحيوط تجيرات و البولات بكل الأشكال زينات الشجر وخا قليل. الضيوف غايتقسمو! على جوج. الخيمة دالرجال بوحدها و الخيمة دالعيالات و البنات بوحدها. ما كاين لا ترتور لا ستة حمص. الطبالي و كل الأواني و حتى الفراش تبرعوا بها الجيران حتي يفوت العرس. عندنا الطباخات الماهرات و حتى النكافة، الكوافورة سعيدة هي اللي غاتقوم بدورها. فرحات مسكينة ملي قلتها ليها، واخا ختي بهيجة كانت معارضة فالاول. ولكن قنعتها بانها محتاجة و ما كاتربحش بزاف وهي المسؤولة على عائلتها. الموسيقى؟ ما تخافوش علينا! الله يجعل البركة فالطعارج و لبنادر و ولاد الدرب! كاع اللي عندو شي آلة جابها و استغل الفرصة باش ابين الموهبة ديالو علله اكتاشفو شي حد!!!
العرس داز بخير كلشي فرح ليا. حتى القاتلة مها (نجاة) و ربيعة اخت عبدالمولى حضروا و تسامحنا. عبد المولى أخيرا بتسم ليه الحظ و نجح فالقرعة ديال المريكان و مشى بطريقة قانونية. بقا فيا مسكين! شي شهر عاد براو ليه يديه. سهام و مريم جاوا ملي ضغطوا عليهم الزملاء فالشركة و حاولت نكون لطيفة معاهم واخا ما خلاو ما قالوا ملي سمعوا انني غانولي مرات المدير! على حساب ماقال باسماعيل، كانوا كايتنافسوا باش افوزوا بيه، ساعة ما عرفوا منين خرجت ليهم!
بابا بوشعيب حلف حتى اجيب الطلبة و قاليهم ما يمكنش ادوز العرس بلى بيهم. جلال العظمة حلف الى مشا شي حد حتى حرك شي قرعة غايهرسها ليه فوق راسو! اتفقوا كاملين باش اعطيوا فكرة و نظرة زوينة على الدرب الشعبي ديالنا. حتى المشرملين ما خلاو ما دارو باش المناسبة تمر على احسن ما يرام. هما اللي تكلفوا بخدمة الضيوف! كمال ما سخاش هاد الجو ايطول. كل مرة يقرب لودني ويقوليا: واو لافي سامبل، يا غيان دو ميور (!waw la vie simple, y a rien de meilleur) يعني ماكاينش بحال البساطة!
الفراق مع العائلة و حومتي و ولاد حومتي ما كانش ساهل. شحال بكيت و بكيت معايا الدرب كامل. اللا رقوش اللي ما عمرني شفتاها طيحات شي دمعة ما سكتوها غير بالكشيفة! بابا بوشعيب قرب من كمال وقال ليه كلمة خلات حبي ليه يزيد : شوف اولدي كمال راني عطيتك تحفة ماشي بنت. انا ما باغي لا مال لا جاه! حاجة وحدة نطلبها منك: دير بشرى بين عينك و راه الله ما عمرو اخيبك! شافيه كمال و ما قدرش احبس الدمعة من عينو و قال ليه: كون هاني الحاج! بشرى ولات طرف مني......
من داك النهار، ما بقيتش بشرى المتعوسة! وليت بشرى المرزاقة ههههههه نتمنى ليكم شي عريس بحال سيدي كمال. و نصيحتي ليكم البنات بالخصوص فتاخرو بذاتكم و ما تحاولوش تظهروا بشي مظهر اخر ماشي ديالكم غير باش الخرين ارضاوا عليكم. ما عمركم تحسوا بشي نقص تجاه خرينات. كل وحدة عطاها الله رزقها. و معمركوم اتقارنو راسكم بغيركم. و كما كانقول ديما: اللي ليها ليها!
النهاية. الى اللقاء مع قصة أخرى....
النهاية