خنت زوجي

 

لجزء 5 :

لمهم كان قالي بغا يتلاقا بيا فشي كافي حيت بغا يرجع لطاليان ....ما تخيلوش شحال بكيت فاش قال ليا غادي يمشي يرجع لطاليان . لمهم قلت ليه ماكرهتش ولكن ما نقدرش راني مزوجة او نخاف .قال ليا اجي عندي لدار .انا رفضت ولكن قال ليا واللهم تخافي ما نقيصكش او داكشي ...بقا عليا حتا قبلت. فعلا مشيت او دخلت .واللهم طاح ليا راجلي فبالي ديك لحظة كنت نسيتو .تفكرت يامات لحب مع محسن فاش كنت ديال راسي ما مزوجاش . لمهم هضرنا فلول عادي حتا تقلبات كلام لحب شوية لقيتو خداني فحضنو انا بقيت فحضنو حسيت براحة والله نسيت كلشي .شوية باسني او بقا كي شوف فيا او يقولي توحشت كاو من بعد مشيييينا فبوسان ...حتا لقيت راسي عطيتو داكشي لي ماكنتش كنبغي نعطيه حتا لراجلي .لمشكلة عطيتو لمحسن بكل حب او فرح بلاما نمانع .هاديك ساعة فاش ساليت او فقت من لكْلبة ماشي لكلبة لي كتعض يعني دوخة او تصطية لي فيا . عاد عرفت راسي انا شحال رخيصة . او عرفت ان محسن ما غاديش يتزوج بيا .اصلا فاش سالينا....ما عنقني ما والو ما قال ليا تا حاجة .قال ليا لبسي خلاص صحابي كي تسناو .رغم ذلك مافهمتش لموضوع مزيان .كنت باقا تايقة فيه .مشيت لدار لقيت راجلي فدار .قال ليا فين كنتي .قلت ليه غي عند صاحبتي مريضة .قال ليا اه صافي ولكن بقاي تعلميني ما تخلينيش مشطون عليك . عرفتي بكترت ما كنكره رجال او كنشوف فعينيهم لمكر . ولكن هاد لحظة بدات شفت لبراءه فعينين راجلي او لمكر فعينين ديالي .لمهم كررت لخطأ مرات ومرات حتا مشا محسن لطاليان . فاش مشا بقا كي قول غادي نتسناك لعمر كلو ... دازت لايام واحد نهار بابا او ماما كانو عندنا فدار قالو لينا مالكم تعطلتو فلولاد .بقاو علينا حتا مشينا درنا فحوصات .حتا دخل عليا راجلي قال ليا نتيجة خرجات او راني ما كنولدش ولكن نتي كتولدي .يلا بغيتي ولاد من حقك طلبي طلاق ا بنت ناس .طبعا انا قلت ليه لا لا نصبر معا كانا ماشي قليلة لأصل .ولكن فلداخل ديالي لقيت راسي فرحانة واخيرا لقيت مبرر باش نتهنا منو او نرجع لحبيبي محسن . لمهم وليت كنتعصب عليه او نتشكا عليه من لفقر او نحشي ليه لهضرة . نتا عايش غي عندنا او عايش فدارنا او نتا ماعندك والو نتا عاكر ماكتولدش نتا ما عندك عائلة .نتا شمكار كلك لاطراس.... ناري عرفتو فاش عرفت انه عاقر دوزت عليه لعذاب شديد .كل مرة فاش كي عصبني كنعطيه شي معيورة ما كي نساهاش . حتا لواحد نهار تعصبت او مشيت عند دار بابا غضبانة . شحال من مرة راجلي تبعني لدار باش يحزرني او يطلب سماحة واخة ما دار ليا والو . ياربي تسمح ليا منو .......تاااااااااااااابع