الجزء السادس
.
.
.
- قول ليا آش كاين راني نموت معاك دوي خوي قلبك عليا هضر يالاه تشجع تكلم .. صافي غانعاود ليك ولكن ماتقول هادشي لحتى واحد .. سرك فبير كبير وغارق بزاف ماتخافش .. مهم عاودت ليه كولشي فاش هزيت لجدي السوارت ودخلت للمكتبة ديالو لي كانت مسكونة وانا ماكنتش عارف وعاودت ليه فاش قريت داك الكتاب وخرج ليا جن على شكل جدي وعاوت ليه حتى على ديك أرعب ليلة عشتها فحياتي فاش بانو ليا دوك الجنيات وقلت ليه حتى على داك الجن لي تسيف بسيفت الواليد وقلت ليه بلي دوك الجنون قالوا ليا آي واحد تقول ليه علينا غانقتلوه هادشي علاش مابغيتش نعاود ليك شوي وهي طيح واحد الصورة من الحيط وتهرس ليها الزاج ديالها وهو يتسد الباب دالبيت بجهد عرفت بلي هادشي من فعايل الجنون .. قلت ليه صافي نمشي بحالي مانبغيش طرا ليك شي حاجة بسبابي هاد المشكل أنا لي طحت فيه وأنا لي إما نحلو ولا نموت بسبابو بغيت نخرج هو يشدني من يدي وقال ليا والله لامشيتي ياهاد الجنون دياولك حتى نبقا معاك تاتهنا منهوم ولا نموتوا بجوج .. لا مانبغيش خويا يموت بسبابي .. عنقني وقال ليا أنا معاك وغانعاونك ماتخافش .. حمدت ربي وشكرتو وفرحت ملي غايوقف معايا ولكن خايف عليه مهم عنقتو وقلت ليه صافي انمشي للدار نشوف جدي كيبقا راه كان مريض قال ليا الله يشافيه .. مهم خرج معايا لبرا وقال ليا رجع فالليل بات معايا أنا مابغيتش نعيشو فالرعب حيت عارف دوك الجنون ماغايخليونيش هاني واخا نمشي للمريخ .. بقا شاد فيا صاف قلت ليه غانجي عندك مشيت للدار سولت على جدي قالو ليا راه كاين فبيتو مشيت دخلت عندو لقيتو كايقرا القرآن جلست حداه حتى كمل وسولتو كيبقا قال ليا لابأس الحمد الله شوي كانشوف حدا الباب ديك الجنية لي لابسة الكحل واقفة قدام الباب وهازا فيدها واحد السيف طويل وموسخ بالدم شفتها ماقدرتش نصبر وعنقت جدي وبديت نغوت ونبكي .. جدي قول ليها ماتقتلنيش قوليها تبعد مني .. مالك اولدي مالك مخلوع شكون هادي علامن كاتهضر ماشفت والو .. لا اجدي راها حدا الباب .. وبغات تقتلني قولها تبعد مني .. صافي ناض جدي وحط يدو على راسي وبدا يقرا عليا القرآن صافي حتى غبرات ديك المخلوقة وتهدنت شوي وهو يقول لي خاصني ندير ليك الرقية اولدي هادشي ماشي عادي أنا سمعت الرقية مابغيتش حيت عارف جدي عندو مع هادشي دالجنون وخفت يفرشني ولا يعيق بدوك الجنون لي خرّجت وقلت ليه راه بغيت نبات مع السيمو هاد الليلة وخفت نتعطل عليه صافي قال ليا سير اولدي حتى لشي مرة اخرى ونديرهالك خرجت من عندو ومشيت قلتها للواليدة وخرجت قربت حدا الدار دالسيمو وصونيت عليه خرج حل ليا ودخلنا جلسنا فالبيت ديالو تموصقنا شوي وصل الليل ومشينا تعشينا سالينا ومشينا النعسوا فالصالون حيت البيت ديالو صغيرة فيها غير بلاصة وحدة مهم هو نعس فسداري وانا نعست فسداري لاخور بتنا فالدار غير بوحدنا حيتاش ماماه مشات عند خالتو تبات عندها والوالويد ديالو خدام ماكايباتش فالدار أنا تكيت ومخلوع ومغطي راسي بالمانطة ومابغاش يدوز عليا النعاس واقيلا تاهو خايف من الجنون مهم وصلات ديك الطناعش دالليل كانسمع صوت ديال خطوات انا سحاب ليا واش السيمو لي ناض ورجع خرجت راسي من تحت المانطة كانشوفو راه ناعس فوق السداري تخلعت ورجعت راسي تحت المانطة وكانقرا القرآن وباقي كانسمع داك الصوت شوي حبس انا بالفضول خرجت راسي نشوف شكون تما نري أشنو شفت في الضلام بانت ليا واحد الحاجة بيضاء وواقفة بدون حركة بالخلعة بدا قلبي كايضرب بالجهد حتى كانسمعو وعرقت وكانترعد بالخلعة شوي عاود طليت مالقيتهاش بديت كانقرا القرآن حتى داني النعاس وصلات ديك الجوج ولا الجوج ونصف كانحس بشي واحد كايحركني بحالا بغا يفيقني انا تخلعت وغطيت راسي وبديت نغوت وابعد مني آش بغيتي عندي والسيمو عتقني شوي كانسمع .. فيق فيق اصاحبي غير انا هادا مالك كاتغوت راني ماغانقتلكش .. هزيت راسي لقيتو سيمو نري اصاحبي قتلتيني بالخلعة آش كاين .. قال ليا نضت للطواليط وماتصورش شنو لقيت تماك .. ماشا وتبعتو من موراه ومخلوع حل الطواليط ناري والله إلا بكيت...يتبع